Malta wriet l-impenn sod u kontinwat tagħha lejn il-kooperazzjoni internazzjonali u l-multilateraliżmu fil-qasam kritiku tal-ġlieda kontra t-terroriżmu billi organizzat f’Malta, bejn it-12 u t-13 ta’ Marzu 2025, flimkien mad-Direttorat Eżekuttiv tal-Kumitat Eżekuttiv kontra t-Terroriżmu, konferenza internazzjonali fuq strateġiji nazzjonali u reġjonali kontra t-terroriżmu. Il-konferenza ġabret flimkien rappreżentanti minn iktar minn 50 stat membru, entititajiet tan-Nazzjonijiet Magħquda, organizzazzjonijiet internazzjonali, reġjonali, u tas-soċjetà ċivili, akkademiċi, u s-settur privat.
L-għan ewlieni ta’ dan l-avveniment kien l-aġġornament tal-Prinċipji ta’ Bogotá dwar strateġiji nazzjonali u reġjonali kontra t-terroriżmu, oriġinarjament imnedija fl-2013, sabiex l-istrateġiji kontra t-terroriżmu jibqgħu effettivi, komprensivi u integrati billi jippromwovu approċċ tal-gvern sħiħ u tas-soċjetà kollha. Għalhekk, fl-aħħar tal-konferenza, ġew varati l-Prinċipji ta’ Valletta, sett ta’ 42 prinċipju gwida li ma jorbtux li joffru rakkomandazzjonijiet esperti lil-Istati Membri u lil organizzazjonijiet reġjonali meta jifformulaw jew jirrevedu l-istrateġiji nazzjonali u reġjonali tagħhom kontra t-terroriżmu.
Il-Prinċipji ta’ Valletta jindirizzaw sfidi, theddid u riskji emerġenti billi joffru gwida prattika sabiex titjieb l-effettività u l-inklussività fl-implementazzjoni ta’ sforzi kontra t-terroriżmu. Dawn il-prinċipji aġġornati jibnu fuq ix-xogħol tal-Grupp ta’ Ħidma fuq Strateġiji Nazzjonali u Reġjonali kontra t-Terroriżmu tal-Patt Dinji tan-Nazzjonijiet Magħquda, kif ukoll fuq it-taħdidiet li saru matul il-konferenza. Fuq kollox, jaqblu mal-Istrateġija Globali tan-Nazzjonijiet Magħquda Kontra t-Terroriżmu u mal-aħħar riżoluzzjonijiet tal-Kunsill tas-Sigurtà marbuta mal-qasam tal-ġlieda kontra t-terroriżmu, jiġifieri riżoluzzjonijiet 1963 (2010), 2129 (2013), 2395 (2017), u 2617 (2021).
Id-dokument ‘Prinċipji ta’ Valletta’, kumpilazzjoni bil-preżentazzjonijiet kollha li saru matul il-konferenza kif ukoll sommarju tad-diskussjonijiet qed jiġu pubblikati sabiex ikunu jistgħu jibbenefikaw minnhom l-Istati Membri, l-organizzazzjonijiet reġjonali u l- partijiet interessati rilevanti kollha.
Sommarju tad-diskussjonijiet tal-konferenza
Kumpilazzjoni bil-preżentazzjonijiet kollha tal-konferenza
Stqarrija mill-Kumitat Eżekuttiv kontra t-Terroriżmu tan-Nazzjonijiet Magħquda
