L-Onor. Chris Fearne huwa l-Ministru għall-Affarijiet Barranin u Ewropej. Huwa ilu Membru Parlamentari tal-Partit Laburista mill-2013 u matul il-karriera politika tiegħu serva f’diversi karigi ministerjali, fosthom bħala Deputat Prim Ministru ta’ Malta, Ministru għas-Saħħa, u Ministru għall-Fondi Ewropej, id-Djalogu Soċjali u l-Ħarsien tal-Konsumatur.
Qabel ma nħatar fil-kariga attwali tiegħu, l-Onor. Fearne serva wkoll bħala Kap tal-Kamra tar-Rappreżentanti u kien imexxi l-Kumitat Permanenti dwar l-Affarijiet Barranin u Ewropej tal-Parlament ta’ Malta. Huwa kien ukoll membru tal-Global Leaders Group on Antimicrobial Resistance u fl-2023 inħatar President tal-Assemblea Dinjija tas-Saħħa.
Qabel nieda l-karriera politika tiegħu, l-Onor. Fearne ħadem bħala tabib u kirurgu għal aktar minn tletin sena. Matul dan iż-żmien serva bħala Konsulent Kirurgu Pedjatriku u Chairman Kliniku fl-Isptar Mater Dei. Huwa kiseb l-edukazzjoni tiegħu mill-Università ta’ Malta, fejn iggradwa fil-Mediċina u l-Kirurġija fl-1987, u wara sar Fellow tar-Royal College of Surgeons of Edinburgh. Huwa ħadem u studja f’numru ta’ sptarijiet tat-tfal fir-Renju Unit, fosthom l-Isptar Great Ormond Street f’Londra, u kien ukoll lettur tal-mediċina fl-Università ta’ Malta.
Chris huwa miżżewweġ lil Astrid, li hija wkoll tabiba u tispeċjalizza fil-kura primarja pedjatrika. Huma għandhom tlett itfal, Dawn, Julian u Rafael, kif ukoll tlett neputijiet.