Is-Segretarju Permanenti fi ħdan il-Ministeru għall-Affarijiet Barranin u Ewropej u l-Kummerċ, is-Sur Christopher Cutajar, mexxa żjara f’Alġeri mis-16 sad-19 ta’ Jannar 2023. L-għan ta’ din iż-żjara kien sabiex ikomplu jissaħħu r-relazzjonijiet bilaterali bejn Malta u l-Alġerija permezz ta’ djalogu kontinwu, skambji kummerċjali msaħħa u l-faċilitazzjoni ta’ kuntatti bejn in-negozji, kif ukoll biex jiġu esplorati forom ġodda ta’ koperazzjoni, inkluż fis-settur tal-enerġija.
Is-Sur Cutajar kellu laqgħat pożittivi mas-Segretarju Ġenerali tal-Ministeru tal-Affarijiet Barranin u l-Komunità Nazzjonali Barra mill-pajjiż, is-Sur Amar Belani, is-Segretarju Ġenerali tal-Kummerċ u l-Promozzjoni tal-Esportazzjonijiet, is-Sur El Jadi Bakir u s-Segretarju Ġenerali tal- Ministeru tal-Enerġija u l-Minjieri, is-Sur Abdelkrim Aouissi. Matul dawn il-laqgħat, kien hemm ftehim komuni miż-żewġ naħat dwar il-ħtieġa li jiġu kkonsolidati r-relazzjonijiet li ilhom jeżistu bejn iż-żewġ pajjiżi għall-benefiċċju taż-żewġ popli. Id-diskussjonijiet missew ukoll kwistjonijiet reġjonali u internazzjonali ta’ tħassib reċiproku, b’enfasi partikolari fuq l-isfidi li qed jiffaċċjaw fil-viċinat immedjat tagħna u li matulhom iż-żewġ naħat tennew l-impenn kondiviż tagħhom għall-istabbiltà u s-sigurtà fir-reġjun tal-Mediterran.
Is-Segretarju Permanenti kellu wkoll laqgħa ta’ korteżija mal-Kamra tal-Kummerċ tal-Alġerija li matulha ż-żewġ naħat qablu li jfittxu oqsma ġodda ta’ kollaborazzjoni biex jiffaċilitaw il-kuntatti bejn il-komunitajiet kummerċjali rispettivi. Matul iż-żjara tiegħu, is-Sur Cutajar żar ukoll il-Konsulat Onorarju ta’ Malta f’Alġeri kif ukoll il-Mużew Nazzjonali ta’ Moudjahid tal-Alġerija li jfakkar l-istorja li biha l-poplu Alġerin wasal biex jikseb l-indipendenza fl-1962.
Matul iż-żjara tiegħu, is-Sur Cutajar kien akkumpanjat minn l-E.T. Philo Meli, Ambaxxatur ta’ Malta għall-Alġerija, is-Sur Claude Bonello, Direttur (Relazzjonijiet Esterni u Affarijiet tal-Mediterran) u s-Sur Duncan Psaila, Konslu Onorarju ta’ Malta f’Alġeri. L-Ing. Abigail Cutajar, Konsulent fi ħdan il-Ministeru tal-Ambjent, Enerġija u Intrapriża akkumpanjat lid-delegazzjoni fil-laqgħa mal-Ministeru għall-Enerġija u l-Minjieri.
