Preżentazzjoni ta’ l-Ittri ta’ Kredenzjali ta’ E.T. Prof. Lino Bianco bħala l-Ambaxxatur tar-Repubblika ta’ Malta għall-Bosnja u Ħerzegovina

L-Ambaxxatur tar-Repubblika ta’ Malta għall-Bosnja u Ħerzegovina, l-E.T. Prof. Lino Bianco, ippreżenta l-Ittri ta’ Kredenzjali lill-E.T. Dr Denis Bećirović, Kap tal-Presidenza tal-Bosnja u Ħerzegovina, fis-6 ta’ Settembru 2024, fl-Uffiċċju tal-Presidenza f’Sarajevo.

Il-preżentazzjoni tal-kredenzjali kienet preċeduta mill-preżentazzjoni mil-Ambaxxatur tal-Copie d’Usage lill-Kap tal-Protokoll Diplomatiku tal-Ministeru tal-Affarijiet Barranin tal-Bosnja u Ħerzegovina fil-5 ta’ Settembru 2024.

Matul iż-żjara tiegħu f’Sarajevo, l-Ambaxxatur Bianco ltaqa’ mad-Dekan tal-Korp Diplomatiku u mal-Viċi President tal-Kamra tal-Kummerċ Barrani tal-Bosnja u Ħerzegovina fejn saru diskussjonijiet dwar l-oqsma potenzjali għal aktar kollaborazzjoni bejn iż-żewġ pajjiżi.

Saru wkoll laqgħat mal-universitajiet pubbliċi li jinsabu fil-kapitali, jiġifieri l-Università ta’ Sarajevo u l-Università ta’ Sarajevo tal-Lvant, fir-rigward ta’ kollaborazzjoni prospettiva ma’ istituzzjonijiet ta’ edukazzjoni terzjarja f’Malta..