Malta u r-Renju Unit igawdu minn sħubija li tmur lura ħafna fiż-żmien u hija sostnuta mill-Qafas ta’ Koperazzjoni Bilaterali bejn Malta u r-Renju Unit. Iż-żewġ gvernijiet jikkommettu li jindirizzaw sfidi komuni, inklużi it-thedida għall-paċi fl-Ewropa u l-immigrazzjoni irregolari. Malta u r-Renju Unit jirrikonoxxu l-koperazzjoni mill-qrib ta’ bejniethom, partikularment matul r-rwoli li kellha Malta fil-Kunsill tas-Sigurta’ tan-Nazzjonijiet Magħquda (UNSC), fl-Organizzazzjoni għas-Sigurta’u l-Koperazzjoni fl-Ewropa (OSCE), u l-Kunsill tal-Ewropa.
Politika Barranija
Fid-dawl tal-kriżijiet internazzjonali li qegħdin dejjem jikbru, Malta u r-Renju Unit jirrijaffermaw l-impenn tagħhom biex ikomplu bil-koperazzjoni ta’ bejniethom fil-politika barranija permezz ta’ ħidma multilaterali. Iż-żewġ pajjiżi jtennu s-sapport bla waqfien tagħhom għal soluzzjoni ta’ żewġ Stati ġusta u dejjiema, inkluż permezz tal-għarfien tal-iStat Palestinjan, kif ukoll is-solidarjetà’ tagħhom mal-Ukrajna fid-dawl tal-gwerra ta’ aggressjoni mir-Russja. Malta u r-Renju Unit jaqblu li jkomplu d-diskussjonijiet fuq kif iżommu r-Russja responsabbli fl-Istituzzjonijiet internazzjonali, inkluż permezz ta’ sanzjonijiet u fil-Kunsill tal-Ewropa, fejn taħt il-Presidenza ta’ Malta fl-2025, inizjattivi ewlenin bħal t-twaqqif tat-Tribunal Speċjali għal reati ta’ Aggressjoni kontra l-Ukrajna u r-Reġistru ta’ ħsara kienu mressqa ‘l quddiem.
Malta u r-Renju Unit jilqgħu is-Summit bejn l-UE u r-Renju Unit li sar fid-dsatax ta’ Mejju, u t-twaqqif ta’ l-EU-UK Strategic Partnership, li rrijafferma il-valuri kondiviżi tagħna u l-impenn għall-koperazzjoni aktar profonda f’kuntest evoluttiv ta’ ġeopolitika dinjija kumplessa. Il-pajjiżi tagħna jaspiraw li jiffaċilitaw ir-relazzjoni ambizzjuża u dinamika bejn UE u r-Renju Unit li tissodisfa l-ħtiġijiet taċ-ċittadini tagħna, inkluż permezz tal-implimentazzjoni f’waqtha tal-Fehim Komuni għal “Aġenda mġedda bejn l-UE u r-Renju Unit – Koperazzjoni mar-Renju Unit – u l-UK-EU Security and Defence Partnership.
Bħala msieħba fil-Commonwealth, Malta u r-Renju Unit itennu l-impenn tagħhom biex jaħdmu flimkien biex jitwettqu l-objettivi maqbula fil-Commonwealth Heads of Government Meeting (CHOGM) f’Samoa fl-2024, b’mod partikolari l-Apia Commonwealth Ocean Declaration. Malta u r-Renju Unit jaqblu li jaħdmu flimkien biex jissaportjaw it-twettiq tal-Pjan Strateġiku ġdid tal-Commonwealth, li jiffoka fuq ir-reżiljenza ekonomika, demokratika u ambjentali u tissapportja l-preparamenti għaċ-CHOGM li jmiss. Ir-Renju Unit jissapportja il-ħidma importanti ta’ Malta bħala Chair tal-Commonwealth Ministerial Action Group (CMAG) biex tħares il-prinċipji fundamentali tad-demokrazija u tad-drittijiet tal-bniedem.
Malta u r-Renju Unit jagħrfu l-vulnerabilitajiet uniċi ta’ Stati Żgħar u fi stadju ta’ Żvilupp (SIDS) u jtennu l-impenn tagħhom li jissapportjawhom fl-adattament tagħhom għall-klima, l-iżvilupp sostenibbli u r-reżiljenza ekonomika, inkluż permezz ta’ involviment fil-fora multilaterali.
Migrazzjoni
Malta u r-Renju Unit se jkomplu jsaħħu l-koperazzjoni fuq id-dimensjoni esterna tal-immigrazzjoni, sostnuta bil-UK-Malta Migration Dialogue. F’Settembru 2025, il-Ministru Malti l-Onor. Byron Camilleri MP, iltaqa’ mad-Direttur tal-Immigrazzjoni fl-Uffiċċju tal-Intern biex jiddiskuti l-isfidi tal-immigrazzjoni, strateġiji ta’ deterrenza, koperazzjoni operazzjonali, u Intelligence sharing. Malta u r-Renju Unit se jkomplu jaqsmu l-informazzjoni u l-aħjar prattiċi biex jindirizzaw l-immigrazzjoni irregolari, il-jasar modern, il-kuntrabandu u t-traffikar tal-bnedmin u r-reati finanzjarji.
Ir-Renju Unit u Malta se jesploraw opportunitajiet għal kollaborazzjoni bejn ir-Renju Unit u l-pajjiżi tal-MED5 (l-Italja, Spanja, il-Greċja, u Malta), b’għarfien tal-importanza tagħhom filli jikkontrollaw l-influssi migratorji fil-fruntieri esterni tal-Unjoni Ewropea. Malta u r-Renju Unit itennu l-impenn tagħhom għall-Konvenzjoni Ewropea tad-Drittijiet tal-Bniedem (ECHR) u l-indipendenza u l-imparzjalita’ tal-Qorti Ewropew tad-Drittijiet tal-Bniedem, filwaqt li jagħrfu l-ħtieġa ta’ oqfsa internazzjonali legali biex ikun jista’ jindirizza l-isfidi tal-lum inkluż l-immigrazzjoni irregolari u l-kuntrabandu tal-persuni.
Ġustizzja u Intern
Malta u r-Renju Unit jaqsmu żmien twil ta’ sħubija u kuntatti effettivi bejn il-forzi tal-pulizija rispettivi, il-ġudikatura u l-professjonijiet legali.
I-infurzar tal-liġijiet bilaterali u l-koperazzjoni tal-Intelligence ikomplu jissaħħu taħt il-UK-Malta Policing Partnership, iffirmat fl-2021, flimkien ma’ skambji regolari ta’ capacity-building kontra t-terroriżmu, l-indirizzar ta’ reati serji u kriminalita’ organizzata, u koperazzjoni ġudizzjarja. Malta u r-Renju Unit huma mpenjati lejn iż-żamma tal-iskambju reċiproku ta’ għarfien espert legali u prattika tajba biex tissaħħaħ l-effiċjenza ġudizzjarja u l-istat tad-dritt fiż-żewġ pajjiżi.
Difiża u Sigurtà
Malta u r-Renju Unit ilhom jibbenefikaw minn rabtiet mill-qrib ta’ difiża u sigurtà’, imsaħħa mill-provvediment reċiproku ta’ taħriġ tal-forzi armati, u appoġġ regolari għall-iffaċilitar ta’ operazzjonijiet barranin tar-Renju Unit.
Fl-2024-2025 Malta appoġġjat iż-żjarat tal-vapuri tal-Royal Navy, għal assistenza loġistika ta’ rutina u prova b’suċċess għal manutenzjoni fit-tul waqt li kienu skjerati. Żjarat regolari minn ajruplani tar-Royal Air Force jiffaċilitaw il-kapaċità’ tal-Forzi Armati tar-Renju Unit li joperaw globalment. Ir-Renju Unit kompla wkoll jagħti taħriġ militari għal uffiċċjali Maltin fis-Single Service Officer Training Schools. Ir-Renju Unit bi pjaċir jassisti fil-parteċipazzjoni ta’ Malta fil-programm Partnership for Peace tan-NATO.
F’April 2025, Malta u r-Renju Unit iffirmaw Pjan ta’Koperazzjoni Bilaterali wiesa’ fuq id-difiża bejn il-Forzi Armati ta’ Malta u l-Ministeru tad-Difiża tar-Renju Unit. Dan poġġa l-bażi għal relazzjoni aktar b’saħħitha u robusta fil-qasam tad-difiża bejn il-friegħi kollha tal-militar rispettivi, li nħarsu ‘l quddiem għal aktar żvilupp fis-snin li ġejjin.
Rabtiet persuni ma’ persuni
Malta u r-Renju Unit tennew l-importanza li jissaportjaw u jippromwovu ir-rabtiet sinifikanti bejn in-nies bejn iż-żewġ pajjiżi bl-intenzjoni li jagħmlu dan permezz tad-diplomazija mill-Kummissjonijiet Għolja rispettivi.
Aktar minn 40,000 ċittadin Malti huwa residenti fir-Renju Unit, u madwar 150,000 ċittadin Brittanniku huwa residenti f’Malta; l-influss tat-turisti bejn iż-żewġ pajjiżi huwa sostanzjali, b’madwar 700,000 ċittadin Brittanniku jżuru Malta kull sena.
Iż-żjara tal-Altezza Reali Tagħhom id-Duka u d-Dukessa ta’ Edinburgh biex jiċċelebraw is-sittin anniversary tal-Indipendenza ta’ Malta f’Ottubru 2024 saħħet aktar ir-rabtiet personali uniċi li jkomplu jorbtu iż-żewġ nazzjonijiet.
Malta u r-Renju Unit qablu li jżommu skambji regolari biex jaċċertaw l-implimentazzjoni bla xkiel u effettiva ta’ bidliet operattivi fil-fruntiera, inkluż l-iskema tal-Electronic Travel Authorisation (ETA), l-EU European Entry/Exit System (EES) u l-European Travel Information and Authorisation System (ETIAS).
Novembru 2025
