Pass importanti ‘il quddiem ieħor fit-twettiq tal-Pjan Nazzjonali kontra r-Razziżmu
Malta ssieħbet mal-Alleanza Internazzjonali għat-Tifkira tal-Olokawst (IHRA) bħala pajjiż osservatur. Din id-deċiżjoni ittieħdet mill-Pajjiżi Membri waqt is-sessjoni plenarja tal-IHRA li saret fi Glasgow, l-Iskozja, nhar is-27 ta’ Ġunju 2024.
Is-sħubija ta’ Malta fl-IHRA huwa element importanti tal-Pjan ta’ Azzjoni nazzjonali kontra r-razziżmu tal-pajjiż, li għandu l-għan li jikkonfronta u jżarma r-razziżmu sistemiku, filwaqt li jiżgura li n-nies ta’ kull etniċita’ jiġu ttrattati b’dinjita’ u rispett.
L-Alleanza Internazzjonali għat-Tifkira tal-Olokawst (IHRA) tlaqqa’ flimkien gvernijiet u esperti biex isaħħu, javvanzaw u jippromwovu l-edukazzjoni, ir-riċerka u t-tifkira tal-Olokawst, u biex jiġġieldu kontra ċ-ċaħda tal-Olokawst u l-antisemitiżmu, li qegħdin jiżdiedu maż-żmien.
Bħalissa hemm 35 pajjiż membru tal-IHRA, fosthom l-Istati membri kollha tal-Unjoni Ewropea, fejn Ċipru, bħal Malta, huwa pajjiż osservatur. Hemm ukoll seba’ pajjiżi osservaturi oħra.
Fid-diskors tiegħu l-E.T. Vanni Xuereb, l-Ambaxxatur ta’ Malta għall-Ġermanja u Kap tad-Delegazzjoni għall-IHRA, tenna mill-ġdid l-impenn ta’ Malta li tibqa’ tfakkar l-memorja tal-Olokawst u tiġġieled il-pjaga tal-anti-semitiżmu u kull forma oħra ta’ razziżmu.
Is-sħubija fl-IHRA turi b’mod ċar id-dedikazzjoni ta’ Malta biex tassigura li kull persuna, irrispettivament mill-etniċità, tkun trattata b’ dinjità u rispett.
