Fil-25 ta’ Jannar 2024, l-Ambaxxatur Clarence Leslie Pace ippreżenta Ittri ta’ Kredenzjali lill-Eċċellenza Tiegħu Zoran Milanovic, President tar-Repubblika tal-Kroazja.
L-Ambaxxatur Pace ġie skortat fl-Uffiċċju tal-President fejn ingħata tislima mill-Uffiċjal Kmandant tal-Gwardja tal-Unur, u wara li ntlaqa’ mill-Kap tal-Protokoll tal-President, ipproċeda lejn il-Sala ta’ l-Istat u tmexxa lejn il-Librerija fejn hu iffirma l-Ktieb tal-Mistiedna.
Wara l-preżentazzjoni tal-Ittri ta’ Kredenzjali sar skambju mal-Eċċellenza Tiegħu l-President tar-Repubblika tal-Kroazja fejn ġew innutati r-relazzjonijiet eċċellenti bejn iż-żewġ pajjiżi kif ukoll ix-xewqa reċiproka li jkomplu jissaħħu r-relazzjonijiet bilaterali.
Preżenti għaċ-ċerimonja kien hemm ukoll rappreżentanti ta’ grad għoli tal-Uffiċċju tal-President fosthom il-Konsulent tal-President għall-Politika Barranija u Ewropea u s-Segretarju tal-Kabinett għall-Politika Barranija u Ewropea. Attendiet ukoll id-Direttur Ġenerali għall-Affarijiet Ewropej tal-Ministeru tal-Affarijiet Barranin u Ewropej tar-Repubblika tal-Kroazja.
L-Ambaxxatur kien akkumpanjat mill-konjuġi s-Sinjura Audrey Pace, u mis-Sur David Muscat, Kunsillier fil-Ministeru għall-Affarijiet Barranin u Ewropej u l-Kummerċ tar-Repubblika ta’ Malta.
Wara ċ-ċerimonja sar skambju ta’ fehmiet mar-rappreżentanti tal-Uffiċċju tal-President dwar kwistjonijiet bilaterali, u ladarba ġiet konkluża il-laqgħa l-Ambaxxatur Pace ġie eskortat sad-Daħla Prinċipali għall-aħħar tislima mill-Uffiċjal Kmandant tal-Gwardja tal-Unur.
Fl-għodwa tal-25 ta’ Jannar 2024, l-Ambaxxatur Pace ippreżenta l-Copie d’Usage lill-Kap tal-Protokoll tal-Ministeru tal-Affarijiet Barranin u Ewropej tar-Repubblika tal-Kroazja. Fis-26 ta’ Jannar 2024 saru laqgħat mad-Direttur Ġenerali għall-Affarijiet Ewropej tal-Ministeru tal-Affarijiet Barranin u Ewropej tar-Repubblika tal-Kroazja, is-Sinjura Zrinka Ujevic, u mal-Konslu Onorarju għal Malta, Dr Zrdavko Kacic.
