Prezentazzjoni ta’ Ittri ta’ Kredenzjali
Fit-22 ta’ Novembru 2023, l-Ambaxxatur Anne-Marie Muscat Fenech Adami ppreżentat l-Ittri ta’ Kredenzjali tagħha lill-Eċċellenza Tiegħu Rumen Radev, President tar-Repubblika tal-Bulgarija.
L-Ambaxxatur Muscat Fenech Adami ġiet skortata sal-Bini tal-Amministrazzjoni tal-President fejn ġiet milqugħa mill-Kap tal-Protokoll tal-Istat, u wara li assistiet għad-daqq tal-Innu Nazzjonali tar-Repubblika tal-Bulgarija spezzjonat il-Gwardji tal-Unur.
Wara l-preżentazzjoni tal-Ittri ta’ Kredenzjali sar skambju mal- Eċċellenza Tiegħu l-President tar-Repubblika tal-Bulgarija fejn ġew innutati r-relazzjonijiet eċċellenti bejn iż-żewġ pajjiżi kif ukoll ix-xewqa reċiproka li jkomplu jissaħħu r-relazzjonijiet kummerċjali.
Preżenti għaċ-ċerimonja kien hemm ukoll rappreżentanti ta’ grad għoli tal-Uffiċċju tal-President inkluż il-Kap tal-Uffiċċju tal-President, is-Segretarju Amministrattiv Kap tal-President, u s-Segretarju tal-Politika Barranija. Id-Deputat Ministru tal-Affarijiet Barranin, E.T. Elena Shekerletova kienet preżenti wkoll.
L-Ambaxxatriċi kienet akkumpanjata mill-konjuġi tagħha s-Sur Brian Muscat, u mis-Sur David Muscat, Kunsillier fil-Ministeru għall-Affarijiet Barranin u Ewropej u l-Kummerċ tar-Repubblika ta’ Malta.
Wara ċ-ċerimonja l-Ambaxxatur Muscat Fenech Adami assistiet għad-daqq tal-Innu Nazzjonali tar-Repubblika ta’ Malta u mbagħad zaret il-Monument tas-Suldat Mhux Magħruf għat-tqegħid ta’ bukkett ta’ fjuri b’sinjal ta’rispett.
Prezentazzjoni ta’ Copie d’Usage
Fil-jum ta’ qabel, il-21 ta’ Novembru 2023, is-Sinjura Anne-Marie Muscat Fenech Adami, Ambaxxatur tar-Repubblika ta’ Malta għar-Repubblika tal-Bulgarija ppreżentat il-Copie d’Usage tagħha lill-E.T. Elena Shekerletova, Deputat Ministru tal-Affarijiet Barranin tar-Repubblika tal-Bulgarija.
Wara ċ-ċerimonja tal-preżentazzjoni, E.T. id-Deputat Ministru awgurat suċċess lill-Ambaxxatur Muscat Fenech Adami matul il-mandat tagħha bħala Ambaxxatur. Id-Deputat Ministru nnotat li hemm numru ta’ toroq li jistgħu jiġu esplorati biex ikomplu jissaħħu r-relazzjonijiet bilaterali eċċellenti fosthom l-edukazzjoni u t-turiżmu kif ukoll il-kooperazzjoni fil-livell tal-Unjoni Ewropea.
L-Ambaxxatur Muscat Fenech Adami rringrazzjat lid-Deputat Ministru u ħarset ‘il quddiem għall-identifikazzjoni ta’ oqsma ta’ kooperazzjoni b’mod partikolari fl-iskambji kulturali, kif ukoll l-edukazzjoni b’fokus fuq it-tagħlim tal-Ingliż.
L-Ambaxxatur Muscat Fenech Adami kienet akkumpanjata mis-Sur David Muscat, Kunsillier fil-Ministeru għall-Affarijiet Barranin u Ewropej u l-Kummerċ tar-Repubblika ta’ Malta.
Saru wkoll laqgħat mal-Aġent Kap tar-Rappreżentanza tal-UE u mal-Konslu Ġenerali Onorarju għal Malta, is-Sur Borislav Boyanov.
