L-Uffiċċju tal-Viċi Prim Ministru u Ministeru għall-Affarijiet Barranin u Turiżmu u l-Organizzazzjoni tal-Istati tal-Karibew tal-Lvant (OECS) iffirmaw Ftehim li jistabbilixxi qafas kooperattiv għal proġetti u attivitajiet komuni f’diversi oqsma maqbula reċiprokament.
Il-Ftehim jenfasizza l-benefiċċji reċiproċi tal-kollaborazzjoni u tal-azzjonijiet kollettivi, b’enfasi speċjali fuq il-prijoritajiet strateġiċi u l-ħiliet komplementari taż-żewġ naħat, bl-iskop li jkun hemm qsim ta’ informazzjoni u kooperazzjoni teknika f’diversi oqsma.
L-OECS, organizzazzjoni inter-governattiva li tinkludi Antigua and Barbuda, Dominica, Grenada, Montserrat, Saint Kitts and Nevis, Saint Lucia, Saint Vincent and the Grenadines, Anguilla, British Virgin Islands, Guadeloupe u Martinique, taħdem biex tippromwovi ħames objettivi ewlenin: l-integrazzjoni reġjonali, l-innovazzjoni ta’ mudelli ekonomiċi, il-promozzjoni tas-sostenibbiltà ambjentali, l-bini tar-resiljenza, u l-promozzjoni tal-eqwità soċjali u l-inklużjoni.
Kif rifless fl-objettivi strateġiċi tal-politika tiegħu, l-Uffiċċju tal-Viċi Prim Ministru u Ministeru għall-Affarijiet Barranin u Turiżmu jagħti importanza kbira lill-promozzjoni u l-avvanz tal-Istati Gżejjer Żgħar li Qed Jiżviluppawf’fora internazzjonali, u jappoġġja inizjattivi ta’ żvilupp tal-kapaċitajiet li huma mmirati lejn il-promozzjoni tal-iżvilupp sostenibbli u tar-resiljenza ta’ dawn l-Istati.
Il-Ftehim ġie iffirmat mis-Sur Christopher Cutajar, Segretarju Permanenti fi ħdan l-Uffiċċju tal-Viċi Prim Ministru u Ministeru għall-Affarijiet Barranin u Turiżmu, u s-Sur Didacus Jules, Direttur Ġenerali tal- Organizzazzjoni tal-Istati tal-Karibew tal-Lvant.
