Bejn l-ewwel u t-tieni ta’ Diċembru 2022, is-Segretarju Permanenti għall-Affarijiet Barranin u Ewropej u l-Kummerċ, is-Sur Christopher Cutajar, żar il-belt kapitali ta’ Ċipru, Nikosija, għall-konsultazzjonijiet politiċi mal-kollega Ċiprijott, l-Ambaxxatur Kornelios Korneliou. Id-diskussjoni trattat ir-relazzjoni bilaterali bejn iż-żewġ pajjiżi u kif din tista’ tissaħħaħ.
Matul il-laqgħa estensiva ġew trattati wkoll materji relatati mal-UE, u kwestjonijiet reġjonali b’enfasi fuq il-Mediterran. Hekk kif Malta u Ċipru għandhom karatteristiċi simili u jaffaċċjaw diversi sfidi komuni, ġew diskussi modi ta’ kif iż-żewġ pajjiżi jistgħu jsaħħu l-kollaborazzjoni. Qabel din il-laqgħa, is-Segretarju Permanenti, kellu skambju ta’ ideat mal-Ministru għall-Affarijiet Barranin ta’ Ċipru, l-E.T. Ioannis Kasoulides.
Is-Sur Cutajar iltaqa’ ukoll mas-Segretarju Permanenti fil-Ministeru għall-Enerġija, Kummerċ u l-Industrija, is-Sur Marios Panayides. Matul din il-laqgħa, ġew diskussi modi ta’ kif il-kummerċ bejn iż-żewġ pajjiżi jista’ jikber. Is-sitwazzjoni attwali tal-enerġija fl-Ewropa kienet ukoll fuq l-aġenda.
