Fit-30 ta’ Jannar 2023, is-Sur Christopher Cutajar, Segretarju Permanenti fil-Ministeru għall-Affarijiet Barranin u Ewropej u l-Kummerċ tar-Repubblika ta’ Malta, ospita lill-E.T. Kreshnik Ahmeti, Viċi Ministru tal-Affarijiet Barranin tar-Repubblika tal-Kosovo għall-konsultazzjonijiet politiċi.
Matul il-laqgħa kordjali, iż-żewġ naħat skambjaw fehmiethom dwar ir-relazzjonijiet bilaterali dinamiċi bejn Malta u l-Kosovo kif ukoll diversi suġġetti oħra ta’ interess reċiproku, fosthom il-gwerra fl-Ukrajna, il-mandat li bħalissa għandha Malta fuq il-Kunsill tas-Sigurtà tan-Nazzjonijiet Magħquda u l-aspirazzjonijiet Ewropej tal-Kosovo, fost l-oħrajn.
Is-Segretarju Permanenti Cutajar u d-Deputat Ministru tal-Affarijiet Barranin Ahmeti ffirmaw it-tiġdid tal-Qafas ta’ Koperazzjoni bejn il-Ministeri rispettivi għall-Affarijiet Barranin li jitratta l-qsim ta’ prattiċi tajba, għarfien, u taħriġ. Barra minn hekk, il-qafas jidentifika oqsma oħra ta’ koperazzjoni, bħas-saħħa, l-edukazzjoni, u l-kultura, bil-għan li jissaħħu r-relazzjonijiet diġà tajbin li jeżistu bejn iż-żewġ pajjiżi.
