Waqt żjara ta’ xogħol fis-Slovenja bejn l-24 u d-29 ta’ Awwissu 2025, l-Ambaxxatur tar-Repubblika ta’ Malta għar-Repubblika tas-Slovenja, l-Eċċellenza Tiegħu Jesmond Cutajar, ippreżenta l-Ittri ta’ Kredenzjali tiegħu lill-Eċċellenza Tiegħu Nataša Pirc Musar, President tar-Repubblika tas-Slovenja, fis-26 ta’ Awwissu 2025, fil-Palazz Presidenzjali f’Ljubljana.
Il-preżentazzjoni tal-kredenzjali ġiet preċeduta mill-Ambaxxatur li ppreżenta l-Copie d’Usage tiegħu lill-Kap tal-Protokoll tal-Ministeru tal-Affarijiet Barranin u Ewropej tas-Slovenja. Matul iż-żjara tiegħu f’Ljubljana, l-Ambaxxatur Cutajar iltaqa’ mal-Kap tar-Rappreżentanza tal-Kummissjoni Ewropea u man-Nunzju Appostoliku. Huwa kellu wkoll laqgħat mal-President tal-Assemblea Nazzjonali u mas-Segretarju tal-Istat fl-Uffiċċju tal-Prim Ministru. Saru wkoll laqgħat fil-Ministeru għall-Affarijiet Barranin u Ewropej tas-Slovenja mas-Segretarju tal-Istat, id-Direttur Ġenerali għall-Kooperazzjoni Multilaterali, id-Direttur Ġenerali Aġent għall-Affarijiet Ewropej, id-Direttur Ġenerali Aġent għad-Diplomazija Ekonomika, Kulturali u Xjentifika, fejn ġew diskussi affarijiet kurrenti, relazzjonijiet bilaterali, u oqsma potenzjali għal aktar kollaborazzjoni bejn Malta u s-Slovenja.
Matul iż-żjara fis-Slovenja, l-Ambaxxatur kien akkumpanjat minn martu u s-Sur Daniel Sammut, l-Ewwel Segretarju fil-Ministeru għall-Affarijiet Barranin u t-Turiżmu ta’ Malta.
